ആശയം

ആശയം ഏതുമാകാം
അത് സ്വാതന്ത്രമാണ്
പക്ഷെ,
ഏതെങ്കിലും വിശ്വാസത്തിൻമേൽ
അടയിരിക്കുന്നതല്ലെന്നും
ഒരു ദേശത്തിലായി ഒതുങ്ങുന്നതല്ലെന്നും
അതെന്ന് സ്വപ്നം കാണാം

വാക്കിലും നോക്കിലും കരുണ പൊഴിയും
പ്രപഞ്ചത്തിൻ്റെ സ്പന്ദനമാണതെന്നും
വെറുതെയെങ്കിലും സ്വപ്നം കാണാം.

പ്രതി

തോക്കാണ് പ്രതി
കാഞ്ചി വലിച്ചവർ അകലെയെങ്ങോ...

തോൽക്കില്ലെന്ന് നിശ്ചയിച്ച
മനസ്സിൻ്റെ മുന്നിൽ
എത്രനാൾ ഇനിയും മറഞ്ഞിരിക്കും.

വിശപ്പ്

വിശക്കണം
ഭക്ഷണം വേണം
കഴിക്കാനാകേണം

പതിനായിരങ്ങൾ വിശന്നിരിക്കുമ്പോൾ 
ദാഹജലത്തിനായി അലയുമ്പോൾ
ആക്രമങ്ങളുടെ മൂർച്ച കൂട്ടാനുള്ള
നീണ്ട ചർച്ചകൾ മാത്രം

കൊന്നുതള്ളിയതിന്റെ കണക്കിൽ ജയാപജയങ്ങൾ വാദിക്കവേ 
അറുപതു കോടി വയറിന്റെ
വിശപ്പിനെ കുറിച്ച് 
എന്ന് ചിന്തിച്ചു തുടങ്ങും

വിശക്കാത്ത വയറുകളോട്
വിശപ്പിന്റെ കഥകൾ
പറഞ്ഞിട്ടും എന്താണ്.

ആ ലോകം

മതങ്ങളുടെ രാജ്യങ്ങളുടെ അതിർ വരമ്പുകളില്ലാത്ത ലോകം
വിശ്വാസങ്ങളിൽ രാഷ്ട്രീയങ്ങളിൽ
രക്തം പൊടിയാത്ത
ഭൂമിയിലാരും എവിടെയും 
വിദേശിയാകാത്ത കാലം
സ്വപ്നമാകാം പക്ഷെ
അകലെയാകില്ലെന്ന
വിശ്വാസമാണ് ആ ലോകം. 

ഈ യാത്ര

ചില യാത്രകൾ അങ്ങിനെയാണ് 
വഴിനീളെ വിരിഞ്ഞ
പൂക്കൾ സാക്ഷിയായി
പെയ്തൊഴിയും കുളിർ മഞ്ഞിൽ
കൈപിടിച്ച് കൂടെ നടക്കാമെന്ന മോഹം
വേനലിൽ എരിഞ്ഞു പോയത്  
അറിഞ്ഞിരിക്കില്ല .

താരകങ്ങൾ കഥപറയും രാവിൽ 
ഉറങ്ങാതെ കൂട്ടിരിക്കാമെന്ന സ്വപ്നം 
കർക്കിട രാവിലെ പേമാരിയിൽ  
ഒലിച്ചു പോയതറിയാതെ
ഇനിയും പ്രതീക്ഷയാകാം
യാത്ര തുടരുകയാകാം.

നാഥാ

ഒരു പുഞ്ചിരിയായി നീ 
വിടർന്നാൽ 
മിഴികളിൽ കരുണയും
മൊഴികളിൽ സ്നേഹവും
പൊഴിയും 
ഒരു മെഴുതിരി വെട്ടമായി
ഇരുളിൽ ആശ്വാസമായി
വഴികാട്ടിയാകും
ചിന്തകൾ നൈർമല്യമായി 
കർമങ്ങൾ പരിശുദ്ധമായി
അഭയഹസ്തമായി
ആ കൃപ ചൊരിയും

ഉയിരിൽ
ഉയർത്തെഴുന്നേറ്റാലും 
ഒരു പുൽക്കൂടൊരുക്കി
ഉള്ളം കാത്തിരിപ്പേറെയായി നാഥാ.

നേരമായില്ല

നീല കമ്പളം പുതച്ചുറങ്ങും
ആകാശം
നക്ഷത്ര കൺകൾ
ചിമ്മി ചിമ്മി പറഞ്ഞു
ഉറങ്ങാൻ നേരമായെന്ന് .

കൂമ്പിയ മിഴികളുമായി
ചെമ്പരത്തിയും
പുലരെ വിരിയാനായി
ഈ രാവിൽ അണിഞ്ഞൊരുങ്ങും
ചെമ്പനീർ പൂമൊട്ടും
പതുക്കെ പറഞ്ഞു
ഉറങ്ങാൻ നേരമായെന്ന്.

കൃഷ്ണ പാദങ്ങളെ
പ്രണയിക്കും തുളസിയും
ആ തപസ്സിനിടയിൽ
നെറുകയിൽ വീണ
മഞ്ഞുതുള്ളിയോടൊപ്പം മന്ത്രിച്ചു
ഉറങ്ങാൻ നേരമായെന്ന്.

അകലെ നിന്നെങ്ങോ
രാക്കിളിയും അത് മൂളി

പക്ഷെ നേരമായില്ല

സ്വപ്നങ്ങളെ മാടിവിളിക്കും നക്ഷത്രങ്ങൾ
ഇഷ്ടങ്ങളെ നോക്കി
പുഞ്ചിരിതൂകവേ
പ്രതീക്ഷയായി ജ്വലിക്കവേ
അതിനാകുമോ?
ഇനി ഒരുനാൾ
അനന്തനീലിമയിലെ താരകങ്ങൾ
കൈവെള്ളയിൽ വന്നണയാൻ ഉണർന്നിരിക്കണമെന്നും അറിയാം.

രാത്രി മഴ

മഴ ചോർന്നില്ല
രാത്രി നേരമിത്രയും
ഇളം കാറ്റിനൊപ്പം പതിയെ
മുത്ത് പൊഴിയുകയാണ്

കൂടെ വന്ന ഇളം കാറ്റിന്
ഇന്നും വികൃതിയാണ്
ഒന്നും പറയാതെ
കുളിരിനൊപ്പം ഓർമകളെയും  
തഴുകുകയായി.

കാലങ്ങൾ എത്ര
പുറകിലായെന്നറിയില്ല
മാറി മറയുന്ന ചിത്രങ്ങൾ
കഥകളെത്രയോ പറയുകയായി
എത്ര തവണ 
കേട്ടുവെന്നറിയില്ല
എങ്കിലും രാത്രി മഴയിൽ
അത് കേൾക്കാൻ  
ഇന്നും കൊതിയായി.

തിരിച്ച് പോകാൻ ആകില്ല 
അത് അകലെയാണ്.
രാത്രി മഴ ഇപ്പോഴും
പൊഴിയുകയാണ്
കുളിരിളം കാറ്റും
കൂടെയാണ്.

കാത്തിരിപ്പ്

ആ കാത്തിരിപ്പിനു വിരാമമായി
മഴ പെയ്തിറങ്ങി
കാറ്റ്‌ മുന്നേ വന്നു
വരവറിയിച്ചതും
സ്വീകരിക്കാനായി മണ്ണ്
ഒരുങ്ങിയിരുന്നു

പരിഭവമെന്നോണം
ഇടയ്ക്കിടെ മിന്നൽ പിണരുകൾ
എങ്കിലും വേനലിൽ തീജ്വാലകളായ
മണ്ണിന്റെ ദീർഘനിശ്വാസങ്ങൾ
ഈ രാവിൽ  കുളിരേകും തലോടലായി

രാത്രി മാഞ്ഞതും
മഴ യാത്ര  പറഞ്ഞിരുന്നു
ഇനി തനിച്ചാണ്
എങ്കിലും  ഈ പുലരിയിൽ
മണ്ണ് നിർവൃതിയിൽ
മയങ്ങുകയാണെന്ന് തോന്നും
ഉണർന്നാൽ ഇനി വീണ്ടും
കാത്തിരിക്കേണ്ടതാണ്.

രാവും പകലും

ഓരോ രാവും
ഒരായിരം കിനാക്കളിൽ 
പുതച്ചുറങ്ങി
മഞ്ഞിൻ കുളിർ തലോടലിൽ
പ്രതീക്ഷയുടെ പുലരിയായി

ഓരോ പുലരിയും
ഒരായിരം പ്രയത്നങ്ങളെ 
തുഴഞ്ഞ്
വിയർപ്പിൻ കുളിരിൽ
നിർവൃതിയുടെ സായാഹ്നമായി

ഒരോ സായാഹ്നവും
പരസ്പര വിശ്വാസത്തിൻ 
അണയാത്ത ദീപപ്രഭയിൽ
സ്നേഹപൂർവം രാവുകളായി

രാവും പകലും
പരസ്പരം  കാത്തിരിപ്പാണ്
കാണില്ലെന്നറിയാം
അരികിലായി വന്നാൽ
ദൂരെയായി പോകണമെന്നറിയാം
ആ പ്രണയം
അത് അങ്ങനെയാണ്.

സാക്ഷി

അന്നേ..  പ്രണയം
നിൻ  കൈകളിൽ
ഏല്പിച്ചതാണ്
ഇന്നും അത് 
സുരക്ഷിതമാണെന്നറിയാം.

നീയും ഞാനും
രണ്ടു ദശാബ്ദങ്ങളായി
പെയ്തുപോയ മഴയും മഞ്ഞും
പെയ്തൊഴിയാത  കണ്ണുനീരിൽ
കാണാതെ പോയിരിക്കാം.
ചുട്ടു പൊള്ളുന്ന
വേനലിൻ ചൂടും
അണയാത്ത നെഞ്ചിലെ
കനലിൽ
അറിഞ്ഞില്ലായിരിക്കാം

ഋതുചക്ര പ്രവാഹത്തിനപ്പുറവും
നാം കാത്തിരിക്കും 
തിരിച്ചു വേണമെന്നു പോലും
പറയാതെ
സൂക്ഷിക്കാനായി
അന്ന്  കൈമാറിയതിന്
കാലം മൗന സാക്ഷിയാണ്. 

കാത്തിരിക്കാം

ഏത് കാലൊച്ചയ്ക്കായി
നിമിഷമോരോന്നും
കാതോർത്തിരിപ്പു നീ

ഏത് പൂവിൻ സുഗന്ധത്തിനായി
കാലമേറെയായി
അലയുന്നു നീ

ഏത് നിലാവിൻ അഴകിനായി
ഇമയണയാതെ
കാത്തിരിപ്പു നീ

ഏത് പുലർകാലം
വന്നണയുവാനായി
എന്നോ ധ്യാനിച്ചിരിപ്പു നീ

മഴയായി വെയിലായി കാറ്റായി
ആ പ്രതീക്ഷകൾ
സ്വപ്നങ്ങൾ...
എല്ലാം ഒളിപ്പിച്ചു വെച്ച്  കാലവും 
കൊഴിഞ്ഞു പോവുകയായി  

കാത്തിരിക്കാം
ജീവശ്വാസം തുടരും വരെയും
അതിനപ്പുറവും
ഏതു ജന്മാന്തരത്തിൽ
വന്നുചേരുമെന്ന് അറിയാതെ
പ്രതീക്ഷയോടെ എന്നും
കൃഷ്ണാ...